यसको अर्थ म सुधार वा परिवर्तनको विपक्षमा छु भन्ने कदापि होइन

नेपाल बाइबल सोसाइटीको संक्षिप्त परिचय
सन् १९७६ मा स्थापना भई २१ मार्च २००७ (२०६३ चैत ०७) मा नेपाल सरकारमा दर्ता भएको नेपाल बाइबल सोसाइटी ख्रीष्टियान मण्डली तथा समाजमा पवित्र धर्मशास्त्र बाइबल र यससँग सम्बन्धित पुस्तक पुस्तिका विक्री वितरण गरी सेवा पु¥याउन समर्पित अन्तर साम्प्रदायिक ख्रीष्टियान गैर सरकारी संस्था हो । यो युनाइटेड बाइबल सोसाइटीज्को सदस्य पनि हो ।
बाइबल सोसाइटीले आफ्नो क्षमता र स्रोत साधनले भ्याएसम्म राष्ट्रमा परिआउने प्राकृतिक प्रकोप र यस्तै अन्य मानवीय आवश्यकताको सामना गर्ने क्षेत्रमा समेत ध्यान पु¥याउँदै आएको छ ।
यसको दर्शन चाहिं नेपालीभाषीहरूलाई आफूले तिर्नसक्ने मूल्यमा, उपलब्ध हुने ठाउँमा, आफूलाई मनपर्ने माध्यम र सज्जामा र आफूले बुझ्ने भाषामा परमेश्वरको वचन उपलब्ध गराउनु हो ताकि मानिसहरूले सत्य जीवित परमेश्वरलाई विश्वास गर्न सकून् ।

नेपालमा बाइबल प्रकाशन कहिलेदेखि सुरु भयो ?
सन् १९९७ बाट

नेपाल बाइबल सोसाइटीले हालसम्म के कस्ता पुस्तक तथा पर्चाहरू प्रकाशन गरिरहेको छ ?

बाइबलहरू, भजनसंग्रहसहितको नयाँ करारहरू, नेपालका केही राष्ट्रिय भाषाका नयाँ करारहरू, बाइबलका एकल पुस्तकहरू, बाइबल क्रमशब्द, बाल बाइबल, बाल सहयोगी पुस्तक तथा चित्रकथा (कमिक्सहरू), सुसमाचारिय पुस्तक पुस्तिका तथा पर्चाहरू, आदि ।

नेपालमा हरेक वर्ष कति प्रति बाइबल प्रकाशन र विक्री वितरण हुन्छ ?
नेपाली भाषी ख्रीष्टियानहरूको माग वा आवश्यकतानुसार यो प्रायः हरेक वर्षजस्तै फरक हुने हुन्छ ।

ख्रीष्टियान बजारमा बाइबल, पुस्तक र अन्य प्रकाशित कृतिहरूको अवस्था कस्तो देख्नुहुन्छ ?
यस प्रश्नको उत्तर सायद फरक फरक व्यक्तिले आ–आफ्नै किसिमले देलान् । बाइबल सोसाइटीको अनुभवअनुसार चाहिं हामी कति नेपाली ख्रीष्टियानहरूमा बाइबल र यससँग सम्बन्धित कुराहरू सकेसम्म सित्तै नभए अति सस्तोमा पाए हुन्थ्यो भन्ने किसिमको देखिन्छ तर आज आएर यो सोचाइमा केही परिवर्तन भएको देख्दा भविष्य राम्रै देखेको छु । देशमा हरेक कुराको बजार भाउ द्रुत गतिमा आक्कासिरहेको स्थितिमा बाइबल, यससँग सम्बन्धित कुराहरू अन्य प्रकाशित कुराहरूको पनि समय सुहाउँदो मूल्यवृद्धिलाई यसरी नै स्वभाविक ठान्ने बानीको विकास गर्दै गए बाइबल सोसाइटी र प्रकाशन क्षेत्रमा लागेका सबैलाई राहत मिल्नेछ भन्ने लागेको छ ।

नेपालबाइबल सोसाइटीले हालसम्म नेपाली भाषाको पवित्र बाइबलको कतिवटा संस्करण (संशोधन)प्रकाशन गरेको छ ?
पूरै बाइबलको हकमा नयाँ संशोधित पवित्र बाइबल सन् १९९७ र पवित्र बाइबल (सरल नेपाली) सन् २००८ गरी दुईवटा संस्करण प्रकाशन भएकोमा नयाँ संशोधित पवित्र बाइबलको हाल पुनः संशोधन समेत जारी छ ।

नेपाल बाइबल सोसाइटीको बुझाईमा पवित्र बाइबलको नयाँ संस्करण के कति कारणले आवश्यक छ ?
भाषामा आउने परिवर्तन, बाइबल सम्बन्धी अझ असल वा प्रमाणित स्रोत तथा प्रविधिहरूको उपलब्धता, ईश्वरशास्त्रको ज्ञान भएका नेपालीहरूको निरन्तर वृद्धि, आदिले गर्दा पवित्र बाइबलको नयाँ संस्करणको आवश्यकता छ ।

पवित्र बाइबलमा रहेका कतिपय शब्दहरू चलन चल्तीको व्याकरण भन्दा भिन्न रहेको भन्ने टिप्पणी छ । यस विषयमा यहाँको धारणा प्रष्ट पारिदिनुहोस् न ?
स्पष्ट भन्नुपर्दा दुई जना भाइहरूले, एक जनाले बाइबल सोसाइटीमा नै आउनु भएर र अर्कोले म सहभागीको रूपमा उपस्थित एउटा ख्रीष्टियान कार्यक्रममा यस विषयमा जिज्ञासा राख्नु भएको थियो । यी प्रसंग बाहेक तपाईंले उठाउनुभएको यो विषयमा म अनभिज्ञ छु ।
बाइबल सोसाइटीमा नै आउनु भएको भाइप्रति म अति धन्यवादी छु र त्यतिखेर पनि धन्यवाद दिंदै उहाँको चित्त बुझे पनि नबुझे पनि छोट्करीमा मैले कारण र जवाफ दुवै दिएर यसबारे सम्बादको ढोका खुला राखेर विदा गरेको छु । आफू पाहुनाको रूपमा उपस्थित त्यस कार्यक्रममा आयोजकको निम्तोको कदर गर्नुपर्ने आफ्नो कर्तव्य सम्झी मैले त्यस भाइलाई यसबारे उहाँको जिज्ञासा विस्तृत रूपमा बुझ्न बाइबल सोसाइटीमा आउन आग्रह गरेको थिएँ । उहाँ आजसम्म आउनुभएको छैन । उहाँ कुनै दिन आउनुहोला भन्ने आशामा अझ प्रतीक्षारत छु ।
मेरो आफ्नो धारणा के छ भने, बाइबल ख्रीष्टियानहरूको धर्मशास्त्र हो,साहित्य होइन । बाइबललाई मैले आफू र सम्पूर्ण मानव जातिको मार्गदर्शक वा संविधानको रूपमा लिएको छु । मेरो विचारमा धर्मशास्त्रको रूपमा यो ख्रीष्टियानहरूको आस्थासँग मात्र नभई भावनासँग पनि गाँसिएको छ । यसको अर्थ म सुधार वा परिवर्तनको विपक्षमा छु भन्ने कदापि होइन । मेरो तात्पर्य यो हो कि बाइबल सोसाइटीले बाइबलमा प्रयोग गरेको भाषा वा व्याकरणको सुधार वा परिवर्तन गर्नुपरेमा बाइबल सोसाइटी एकलै वा सीमित सुझावको आधारमा नभई यसलाई यस सम्बन्धी क्षमता र ज्ञान भएका ख्रीष्टियानहरूको विस्तृत सभा वा समूहमा राखेर, गहन छलफल वा विचार विमर्शपछि सर्वसम्मतले नभए पनि बहुमतले पारित गरेर मात्र कार्यान्वयन गर्नुपर्दछ । जुन कुरा बाइबल सोसाइटीले हाल जारी रहेको संशोधनको कार्य पूरा भएपछि छापेर आउने बाइबलको छपाईपूर्व गर्ने निश्चतत गरिसकेको छ र संशोधनको कार्य स्तरीय र छिटो छरितो प्रकारले हुनसकोस् भनी प्रार्थना गरिदिनु हुन समेत अनुरोध गर्दछु ।
यस विषयमा टिप्पणी गर्ने व्यक्तिहरूले यस विषय बाहिर नभई बाइबल सोसाइटीसँग उठाइदिनुभएको भएदेखि बुद्धिमानी र बाइबल सोसाइटीको सेवा अझ प्रभावकारी हुन्थ्यो जस्तो लाग्छ । साथै, ख्रीष्टियानहरूले बाइबलको भाषा व्याकरणको मात्र नभई आफ्नो लेख रचनाको साहित्य शुद्धिमा चाहिँ कतिको ध्यान पु¥याएको छु भन्ने ध्यान दिनुपर्ने बेला आएको हो कि ?

नेपाली भाषाका पुस्तक प्रकाशनको विषयमा तपाईंले देख्नुभएको समस्याहरू के के छन् ?
मैले तपाईंको प्रश्न सही किसिमले बुझेँ भने, मेरो विचारमा प्रकाशनमा प्रयोग गरिने भाषास्तर, प्रकाशनको स्तर वा मापदण्ड, कति पाठकहरूको अरूले किनेको पुस्तक पत्रिका मात्र पढ्ने बानीलाई मुख्य भन्नुपर्ला ।

Related Articles

Back to top button