तिनलाई एउटा खम्बामा बाँधी जिउँदै जलाइयो

सुधारवादीहरूको कप्तानको रूपमा चिनिने विलियम टिन्डेलको जन्म करिब ख्रिस्टाब्द १४९४ मा इङ्गल्यान्डमा भएको थियो । तिनी नै नयाँ करारको बाइबललाई अङ्ग्रेजी भाषामा छाप्ने प्रथम व्यक्ति हुन् । तिनी आठ ओटा भाषा आफ्नै भाषाजस्तै गरी बोल्न सक्थे । टिन्डेललाई बारम्बार अङ्ग्रेजी भाषाको कालिगडको रूपमा उल्लेख गरिन्छ । बीबीसीले ख्रिस्टाब्द २००२ मा प्रसारण गरेको इङ्गल्यान्डको इतिहासमा १०० जना महान्‌तम ब्रिटिस नागरिकहरूको सूचीमा विलियम टिन्डेलको नाउँ छब्बिसौँ स्थानमा परेको थियो ।

अङ्ग्रेजी टिन्डेलको समयको सबैभन्दा महत्त्वपूर्ण भाषा थियो । तर बाइबल अङ्ग्रेजी भाषामा छापिएको थिएन । हरेकले बाइबल पढ्न पाउनुपर्छ भन्ने विचार थियो विलियमको । बाइबललाई अङ्ग्रेजीमा अनुवाद गरी त्यसलाई छाप्ने तिनको सपना थियो ताकि सर्वसाधारणले पनि आफ्नै भाषामा बाइबललाई बुझ्ने गरी पढ्न सकून् ।

१५२६ मा टिन्डेलले वर्मस भन्ने ठाउँमा आफूले अनुवाद गरेको नयाँ करारको बाइबल छापेर निकाले । आफ्नो देशलाई आफूलाई भन्दा बढी माया गर्ने टिन्डेलले बाइबलका ती प्रतिहरूलाई तुरुन्त जहाजद्वारा इङ्गल्यान्डमा पठाइदिए । तिनको नयाँ करारको बाइबल इङ्गल्यान्डमा चारैतिर पढिन थालेपछि त्यहाँका धर्माधिकारीहरूले भएभरको शक्ति प्रयोग गरी टिन्डेलको अनुवादको घोर भत्सर्ना गरे । तिनको बाइबल पढेको कारणले गर्दा टिन्डेललाई सहयोग गर्ने हम्फ्रीसाथै अन्य धेरैलाई जेल हालियो । तिनको बाइबललाई वितरण गरेकाले तिनका भाइ जोन गिरफ्तार गरिए । सतावट यति क्रुर र तीव्र थियो कि टिन्डेलद्वारा पहिलो संस्करणमा छापिएका अनुमानित ३,०००-६,००० प्रतिहरूमध्ये सबै नै जलाइए र अहिले केवल एउटा मात्र अस्तित्वमा छ ।

त्यस बेला हेन्‍री आठौँ इङ्गल्यान्डका राजा थिए । तिनी विलियम टिन्डेलदेखि निकै रिसाएका थिए । तसर्थ, तिनले टिन्डेललाई मार्न खोजेका थिए । टिन्डेल केही समयको लागि लुक्न सफल भए । तर १५३४ मा राजाले हेन्‍री फिलिप्स नाउँ गरेको व्यक्तिलाई भेटे जसले टिन्डेलको साथी भएको नाटक गर्योा । त्यसले टिन्डेललाई रात्री भोजमा निमन्त्रणा दियो । हेन्‍री फिलिप्स इङ्गल्यान्डका राजाको लागि काम गर्दै थियो भनी गरिब टिन्डेललाई थाहा थिएन । त्यो रात्री भोज तिनको लागि एउटा षड्यन्त्र थियो । जब भोजको लागि टिन्डेल आइपुगे तब तिनी पक्रिए र अङ्ग्रेज अधिकारीहरूको हातमा सुम्पिए । तिनले ५०० दिनभन्दा बढी कठोर कैदको जीवन जिउनु पर्योह । ६ अक्टोबर १५३६ तारिखको बिहान तिनलाई एउटा खम्बामा बाँधी जिउँदै जलाइयो । मर्ने बेलामा तिनले यसो भन्दै प्रार्थना गरेका थिए, “हे प्रभु, इङ्गल्यान्डका राजाका आँखा खोलिदिनुहोस् ।” तिन वर्षपछि अर्थात् १५३९ मा राजा हेन्‍री आठौँद्वारा अङ्ग्रेजी भाषामा निकालिएको “महान् बाइबल” को प्रकाशनमा यो प्रार्थनाको वास्तवमै सुनुवाइ भयो ।

–  Reasons to Believe

Related Articles

Back to top button