अष्ट्रेलियामा पनि छोडेनन् जीवनले सुसमाचार प्रचार गर्न

 

जीवन बचाऊ नेपालका राष्ट्रिय निर्देशक तथा नेपाल गोस्पल चर्चका डिकन श्री जीवन रायमाझी हाल अष्ट्रेलियामा हुनुहुन्छ । उहाँले अष्ट्रेलियाको विभिन्न ठाउँहरूमा सुसमाचार प्रचार गरिरहनुभएको छ । उहाँको जोश झन् झन् बढ्दै गइरहेको उहाँ बताउनुहुन्छ । उहाँ भन्नुहुन्छ, “नेपालमा सुसमाचार सुनाउन नेपाली मात्र पाउँथे, तर यहाँ अष्ट्रेलियामा त नेपाली लगायत बिभिन्न देशका मानिसहरूलाई येशू ख्रीष्टको बारेमा बताउने मौका पाइरहेको छु । केही महिना अघि मात्र अष्ट्रेलिया पुग्नुभएको रायमाझी दम्पत्तिको जीवनशैली नै सुसमाचार सुनाउनुजस्तै बनेको छ । उहाँको जीवन गवाहीद्वारा धेरै मानिसको जीवन परिवर्तन हुनुका साथै धेरैले उत्साह पाएको कारण उहाँ आफैपनि उत्साहित हुनुभएको छ । उहाँको नाम नै जीवन भएकोले हो कि उहाँ सबैले ख्रीष्टमा जीवन पाउनुपर्छ भन्ने मान्यता राख्नुहुन्छ । सामाजिक सेवा मार्फत् परमेश्वरको राज्यमा उद्धार र सुधारको काम गर्न सकिने भन्दै मण्डली, संघ, संस्था समुदायसँग सहकार्य गर्दै अनाथ, असहाय हिंसा पीडित महिला, झ्यालखानामा भएका बन्दीहरूमाझ सेवा पुर्याउँदै आउनुभएको छ । सुसमाचार नै सम्पूर्ण मानवजातिका लागि उद्धार र सुधार को कडी हो भन्ने रायमाझी कसैसँग भेट भयो कि सुसमाचार सुनाउने मौका लिइ हाल्नुहुन्छ । हाल सिड्नीको रेल्वे स्टेसन, पार्क तथा अन्य ठाउँहरू उहाँको सुसमाचार सुनाउने सहज स्थल बनेको छ । उहाँ भन्नुहुन्छ, “यो येशू प्रभुको आज्ञा हो, संसारको जुनसुकै कुनामा रहेपनि प्रभुको आज्ञा पालन गरिरहने छु । यसैमा जीवनमा साँचो आनन्द छ ।

https://www.youtube.com/watch?v=tK91j098-Og&feature=youtu.be

 

 

Related Articles

Back to top button