रामप्रसाद पौडेल

यो लेख तपाईंको सुन्दर ब्यबहार र अनौठो सोख देखेर तयार पारिएको हो । यो लेख पढेर तपाईंले परमेश्वरले तपाईंको जीवनमा गर्नुभएको अचम्मको कामको लागि उहाँलाई धन्यवाद दिन सक्नुहुन्छ । यो लेख तपाईंको जीवनको समग्र अध्ययन हो । यसमा मैले तपाईंको अद्धितीय जीवनशैलीको प्रशंसा गरेको छु । प्रशंसा सुन्न कसलाई मन लाग्दैन र ? बडो खुशीसाथ तल पढेर हेर्नुहोस् है त….. ।

तपाईं काठमाण्डौं, पोखरा, विराटनगर, धरान, नेपालगञ्ज, धनगढी, हेटौंडा, बुटवल वा अन्य कुनै शहरमा बसेर भव्य सेवकाई गर्ने परमेश्वरकोे दास हुनुहुन्छ । तपाईंको अण्डरमा धेरै मण्डलीहरू स्थापना भएका छन् । तपाईं धेरै सेवकहरूको अन्नदाता हुनुहुन्छ । तपाईं कुनै सम्प्रदाय, संस्था वा प्रतिष्ठानको जुझारु नेतृत्व गर्नुहुन्छ । तपाईंलाई समयमा भेट्न सकिँदैन, एक साता पहिल्यै समय लिनुपर्छ । म जान्दछु तपाईं अति व्यस्त हुनुहुन्छ । तपाईंलाई भेट्नेहरू धन्यका हुनेछन् । तपाईं वर्षमा थोरै दिन मात्र नेपालमा बस्नुहुन्छ बाँकी समय तपाईंको विदेशमै बित्छ । हुँदै नभए पनि वर्षमा एकपटक त तपाईंले एसिया छिचोल्नै पर्छ ।
तपाईं इसाईहरूको राष्ट्रिय नेतृत्व गर्नुहुन्छ । तपाईं नेपालको मण्डलीको इतिहास बन्दै हुनुहुन्छ । तपाईंलाई हेरेर नै धेरै नयाँहरू उत्साह प्राप्त गर्छन् । तपाईंलाई आफ्नो जीवनको हिरो ठान्दै तपाईंजस्तै हुन चाहनेहरू नेपालमा धेरै छन् । तपाईंको व्यक्तित्व शालीन छ । तपाईंमा नम्रता देख्न पाईन्छ । तपाईं सभा सम्मेलनमा आगो झार्ने वक्ता हुनुहुन्छ । तपाईंको वचनले धेरै जनाले जोश पाएका छन् र सेवकाईमा विलीन हुने आँट समेत गरेका छन् । तपाईंले विभिन्न कार्यक्रममा बोल्ने दुई शब्दले विशेष महत्व राख्छन् । तपाईंले लेख्ने पुस्तकहरु लाभप्रद छन् । नेपालका मण्डलीहरुको निम्ति ती पुस्तकहरु अति नै उपयोगी छन् । अरूको पुस्तकहरूमा तपाईंले दिने शुभकामनाका शब्दहरु पनि अति नै शुभ छन् । तपाईं वास्तवमै अति उच्च हुनुहुन्छ ।
तपाईं परमेश्वरको आशिषित् जन हुनुहुन्छ । तपाईंले सेतै फूलेको कपालमा लगाउनुभएको मेहन्दी महंगो मार्काको रहेछ क्यारे तपाईंको कपाललाई दुरुस्त प्राकृतिक बनाएको छ । फूलेकै भए पनि तपाईंको केस कति राम्रा ? तपाईं महंगो गाडी चढ्नुहुन्छ । वातानुकूलित चारपाङग्रेबाट सर्लक्क ओर्लँदा तपाईं स्वर्गदूत झैं देखिनुहुन्छ । म मान्दछु त्यस बेलामा तपाईं हुनुभएको भए स्वर्गदूतहरुले पनि तपाईंलाई आदर्श ठान्दा हुन् । तपाईंले लगाउने जुत्ता अति चिल्ला छन् । जुत्ता रक्षाकै लागि भए पनि तपार्इंले गाडी चढ्नै पर्छ । फेरि त्यो गाडी परमेश्वरले दिनुभएको आशिष् पो हो त । आशिष्लाई इन्कार गर्न पनि त भएन नि, हैन र ? आशिष् पाएकै कारण तपाईं आलिसान महलको मालिक हुनुभएको छ । तपाईं पनि सायद निर्धक्क हुनुहुन्छ कि जगत्को अन्त्यसम्म तपाईंको महल स्थिर रहनेछ । प्रभुको आगमनमा पनि तपाईं त्यो घर वा गाडीभित्र लुकेर आफूलाई सुरक्षित गराउन सक्नुहुन्छ । बाहिर फेरो जाँदा तपाईं तारे होटलमा बस्नुहुन्छ र होटल मालिकलाई समेत आशिषित् बनाउनुहुन्छ । होटलमा तपाईं सोडसीहरुको चाह गर्नुहुन्छ र श्रीमतीहरूलाई फोनमा आई मिस यु अ लट भन्दै अप्रिल फुल मनाइदिनुहुन्छ ।
तपाईं प्रकृतिलाई अति नै प्रेम गर्ने परमेश्वरको इमान्दार उत्तराधिकारी हुनुहुन्छ । तपाईंको घर वरपर अदनको बगैंचा छन् । त्यहाँ कहिलेकाहिँ तपाईं आफ्नी श्रीमतीसँग प्रेमालाप गर्नुहुन्छ र आदम र हव्वाको लीला कल्पनुहुन्छ । अहो तपाईंको पुष्पवाटिका कति सुन्दर ? हजारौं पुष्पहरूले शोभित ती बेबिलोनको झुलनबाग झैं देखिन्छन् । तपाईंलाई देख्नेहरूले कुनै रीतिले पनि सम्झन सक्तैनन् कि तपाईं कुनै दिन चप्पल पड्काएर शहरका गल्ली हुँदो रोजिरोटीका लागि भौतारिँदै हिँड्नुहुन्थ्यो । अहिले त तपाईं कहाँ हो कहाँ । तपाईं लाखौं मूल्यमा कुकुर किनेर पाल्नुहुन्छ र आफू झन् सुरक्षित भएको महशुस गर्नुहुन्छ । ती कुकुरहरूलाई तपाईं दैनिक १ किलोभन्दा बढी मासु कलेजो खुवाउनुहुन्छ बरु आफू हड्डीकै सुप पिउन तयार हुनुहुन्छ । आखिर परमेश्वरले दिनुभएको आशिष् न हो । कुकुरको पालन पोषण र रक्षाको लागि तपाईं महिनामा हजारौं खर्च गर्नुहुन्छ । कहिलेकाहीँ सपिङ्ग गर्न जाँदा तपाईंलाई फोहोरी बालबालिकाले घेर्छन् र तपाईं सामु हात पसार्छन् । यो कुराले तपाईंलाई दिक्क लगाउँछ । तपाईं तिनीहरूलाई हपार्नुहुन्छ र आफ्नो कुकुरको लागि महंगो सामान किनेर फर्कनुहुन्छ । तपाईंले कुकुरलाई आफ्नो सन्तान तुल्याउनुभएको छ, त्यसकारण सन्तानको पालनपोषण गर्ने अभिभावकको कर्तव्य कुशलतापूर्वक निभाइरहनु भएको छ । तपाईं राति कुकुरसँगसँगै सुत्नुहुन्छ र तपाईंकी श्रीमती पनि । तपाईंले श्रीमतीबाट भन्दा कुकुरबाट बढी न्यानो महशुस गर्नुभएको छ । आफ्ना वर्करहरुलाई तपाईं महिनैपिच्छे २५०० बाँड्नुहुन्छ र आफ्नो कुकुरको खर्च हिसाब गरेर वर्करहरुसँग तुलना गर्नुहुन्छ । निश्चय नै तपाईंको कुकुर पाँचजना वर्करभन्दा बढी भएकोले तपाईं मख्ख पर्नुभएको छ । तपाईं आफ्नो घरमा आउने पाहुनाहरूलाई कुकुरसँग परिचय गराउनुहुन्छ र भन्नुहुन्छ “यो मेरो सन्तान हो यसलाई म अति प्रेम गर्छु ।” कुकुर लपलपाउँदै तपाईंको मुख चाट्न आउँछ । कुकुरबाट प्रेम पाएर तपार्इं फेरि धन्य हुनुभएको छ ।
तपाईं आफ्नो दाताहरूप्रति अति नै इमान्दार हुनुहुन्छ । उनीहरूले चाहे अनुरुपकै रिपोर्ट बनाउने कला जान्नुभएको छ । उनीहरू आफ्नो लगानीको क्षेत्र अवलोकन गर्न आउँदा तपाईं अग्लो डाँडामा उनीहरुलाई लिएर जानुहुन्छ र देखिने जति गाउँ सबैमा स्तरीय सेवकाई भइरहेको जनाउ दिनुहुन्छ । राजनीतिक परिस्थितिको कारण दाताहरू त्यो गाउँमा जान नसक्ने बताउँदै उनीहरुलाई पुनः होटलमै फर्काइदिनुहुन्छ । दाताहरुको सामुन्ने तपाईं आत्माले भरिनुहुन्छ र आफ्नो जातिको लागि रुनुहुन्छ । तपाईंको रुवाईले दाताको आत्मालाई छुन्छ र सपोर्ट बढ्ने सम्भावना हुन्छ । सपोर्ट बढेपछि तपाईको जीवनशैली स्तरीय हुन्छ । कुकुरहरूको हेरचाहमा ध्यान दिन सकिन्छ । २५ सय गोटाको एकाध वर्कर पनि थप्न सकिन्छ । तपाईं यी सबै गुनेर परमेश्वरलाई धन्यवाद दिनुहुन्छ ।
तपाईंको जीवन बखान सुनेर तपाईंलाई रमाइलै त लाग्यो होला नि । केही नराम्रो लाग्यो भने तलको ठेगानामा इमेल गर्नुहोला वा पत्रिकामा प्रतिकृया पठाउनुहोला । यतिखेर चाहिँ तपाईंलाई परमेश्वरले गर्नुभएको सहायताको लागि आउनुहोस् एक पटक फेरि धन्यवाद दिऊँ ।
लष्कतबचmन२नmबष्।िअयm