रेभ डा बाल कृष्ण शर्मा

आज २३ डिसेम्बर २०१७ । यस सम्बतलाई इश्वी सम्बत भनिन्छ । येशू आजभन्दा २०१७ वर्ष पहिले मानव बन्नुभई यस पृथ्वीमा आउनुभयो भनी यसले सन्देश प्रदान गरेको छ । यो येशू वा इश्वी सम्बत हो भनी जान्दा जान्दै पनि धेरै व्यक्तिहरूले यसलाई अंग्रेजी सम्बत भनी सम्बोधन गरेको सुन्दा मलाई अचम्म लाग्छ । यदि हामीले २०१७ लाई अंग्रेजी सम्बत भनिराखेका छौँ भने आजदेखि आफैलाई सुधार गरी येशू सम्बत भनी सम्बोधन गरौँ ।
येशू ख्रीष्ट को हुनुहुन्छ भन्ने बारेमा आज धेरै व्यक्तिहरूलाई भ्रम छ । त्यो भ्रम हटाइ येशूमा विश्वास गर्नुहोस् भनी म आग्रह गर्न चाहन्छु । येशू ख्रीष्टको सम्बन्धमा म छोटकरीमा केही तथ्यहरू बताउन चाहन्छुः अब हामी लूका २ अध्यायको १ देखि ११ पदसम्म हेरौँ ।

१ येशू ख्रीष्ट भविष्यवाणी पूरा गर्नका लागि ठीक समयमा आउनुभयो । येशूको अर्थ मुक्तिदाता हो र ख्रीष्टको अर्थ अभिषेक गरिएका व्यक्ति हो । येशू ख्रीष्ट यस धर्तीमा जन्म लिनुभन्दा हजारौँ वर्ष पहिले नै उहाँ मानव बनी आउनुहुनेछ भन्ने भविष्यवाणी भएको थियो । बाइबलको पहिलो पुस्तक उत्पत्ति ३ः१५ मा पनि उहाँको जन्मको बारेमा अगमवाणी भएको थियो । त्यसैगरी यशैया र मीका जस्ता अगमवक्ताहरूले येशूको जन्मका बारेेमा सयौँ वर्ष पहिल्यै अगमवाणी गरेका थिए जुन कुरा येशू आउनुभन्दा पहिले लेखिएको पुरानो करार बाइबलमा उल्लिखित छ । मीका ५ः२ मा येशू बेथलेहेममा जन्मनु हुनेछ भन्ने अगमवाणी भएको थियो । त्यही अगमवाणी पूरा गराउनका लागि परमेश्वरले रोमी सम्राट कैसर अगस्टसलाई प्रयोग गर्नुभयो । योसेफ र मरियम बेथलेहेम निवासी थिएनन् र उनीहरू करीब ६० कि मि टाढाको नासरतमा बस्थे तर सम्राटले त्यही समयमा हरेकले आफ्ना पुर्ख्यौली ठाउँमा गई नाउँ लेखाउनुपर्ने आदेश दिएका हुनाले उनीहरू बाध्य भएर बेथलेहेम जानुपर्यो । सम्राटको आदेशका कारण अगमवाणी पूरा भयो । बेथलेहेम बाहेक येशू संसारको अरु कुनै पनि ठाउँमा जन्मन सक्नुहुने थिएन । शारीरिक रुपमा उहाँ विश्वको अरू कुनै पनि ठाउँमा जन्मन सक्नु हुने थिएन । त्यसका साथसाथै अप्रत्यक्ष रूपमा परमेश्वरले कुनै पनि व्यक्ति वा शासकलाई आफ्नो योजना पूरा गर्नका लागि प्रयोग गर्न सक्नुहुन्छ भन्ने सन्देश पनि हामी यहाँ पाउँछौँ ।

२ ख्रीष्ट जन्मको समयमा सबैभन्दा पहिले गोठालाहरूलाई सन्देश पठाइयो । स्वर्गदूतले सन्देश लिएर गए । स्वर्गदूतको ज्योतिलाई देखेपछि तिनीहरू डराए । तर स्वर्गदूतले तिनीहरुलाई नडारनका लागि आग्रह गरे । येशूको जन्मले मानिसको जीवनमा भएको डरलाई हटाउँछ । आज मानवजाति विभिन्न कुराहरूसँग डराउँछ । ऊ डराउने सबैभन्दा ठूलो कुराचाहिँ मृत्युको डर हो । यही मृत्युको डरको कारण नै आज विश्वमा मृत्यु पछिका असंख्य विधिहरू छन् । येशूको जन्मले भविष्य वा मृत्युको डरलाई हटाई त्यसको स्थानमा आशा र अनन्त जीवनको निश्चयता राखिदिएको छ । के आज तपाईंलाई विभिन्न खालका डरहरूले भरेको छ अवश्य पनि तपाईंलाई भरेको छ तपाईं येशूकहाँ आउनुहोस् र उहाँले तपाईंको डर आफूले लिनुहु्न्छ र तपाईंमा शान्ति राखिदिनुहुन्छ ।

३ ख्रीष्ट येशूको जन्ममा स्वर्गदूतहरुको एक ठूलो दलले पहिलो ख्रीष्टमसको गीत गाएको थियोः

सर्वोच्चमा परमेश्वरलाई महिमा र पृथ्वीमा उहाँ प्रसन्न हुनुभएका मानिसहरूलाई शान्ति ।

येशूको जन्मले परमेश्वर र मानिसको बीचमा सम्बन्ध स्थापना गराएको छ। हामीले पहिलो मानव आदममा गुमाएको अधिकार येशू ख्रीष्टमा फेरि प्राप्त गरेका छौँ । त्यसैले सर्वोच्चमा परमेश्वरलाई सदासर्वदा महिमा भइरहोस् । पृथ्वीमा ती मानिसहरूसँग परमेश्वर प्रसन्न हुनुहुन्छ जसले येशू ख्रीष्टलाई मुक्तिदाता र प्रभुका रूपमा स्वीकार गर्छन् र आफ्नो जीवनभरि उहाँमा विश्वास गर्छन् ।
ख्रीष्टमस वा ख्रीष्ट जन्मको यस स्मरणको समयमा आजसम्म जति जनाले येशूलाई मुक्तिदातका रुपमा विश्वास गर्नुभएको छैन यही अवसरमा उहाँमा विश्वास गरी अनन्त जीवनको हकदार बन्नुहोस् । ख्रीष्टमस भनेको बाहिरी रुपमा रमाइलो गर्ने कुरा मात्र होइन यो त भित्र हुने परमेश्वरीय परिवर्तन हो र यस अवसरमा तपाईंको जीवन परिवर्तन हुनेछ । प्रभु येशू तपाईंको जीवनमा जन्मनु भएको होस् र तपाईंहरू जतिले येशूलाई आफ्ना जीवनमा ग्रहण गर्नुभएको छ प्रभुमा बढ्नुहोस् र उहाँको सेवा गर्नुहोस् । सबैलाई ख्रीष्टमसको शुभकामना र नयाँ वर्ष २०१८ को पनि शुभ कामना । धन्यवाद।