-भुवन देवकोटा
ख्रीष्टियान परिवारसम्बन्धि शिक्षा दिने बेलामा पावलले यसरी एफिसीका विश्वासीहरूलाई अर्ति दिएका थिए । दोस्रो पुस्तालाई तयारी गर्नको लागि योभन्दा गतिलो र बाइबलीय तरिका अर्को छैन भन्ने निष्कर्ष नयाँ नियममा यत्रतत्र पाइन्छ । छोराछोरीलाई परमेश्वरको वचन र शिक्षामा हुर्काउने र बलियो बनाउने काम मुख्यगरी बुबाको हो ।
समाजशास्त्रीहरू पनि यो निष्कर्षमा छन् कि बच्चाको पहिलो शिक्षा आफ्नी आमाको काखबाट सुरु हुन्छ भने दोस्रो शिक्षा बुबाको काँधमा । स्कुलको औपचारिक शिक्षा सुरु हुनुअघि र सुरु भएपछि पनि निरन्तर बुबाबाट छोराछोरीले सिक्नैपर्छ ।
हरेक मण्डलीमा बाल संगति हुनु असल र आवश्यक कुरा हो तर त्योभन्दा पहिले र मुख्य हरेक घरमा केटाकेटीले परमेश्वरको वचनबाट सिक्नु महत्त्वपूर्ण हुन्छ । युवा सेवकाइ र बाल सेवकाइको अति नै ठूलो महत्त्व हुँदाहुँदै ख्रीष्टियान परिवार र परमेश्वरको वचनबाट छोराछोरीलाई सिकाउने अभिभावकहरू ती दुवैभन्दा माथि र मुख्य छन् । कुनै घरमा पारिवारिक वेदी छैन र परमेश्वरको वचन सिक्ने र अभ्यास गर्ने वातावरण छैन भने हप्तामा केही घण्टा सिकेको कुराले जीवनमा सम्पूर्ण परिवर्तन आउँदैन । युवा वा बाल संगति वा सेवकाइ त त्यसलाई भरथेग गर्ने कुरा मात्रै हो, मुख्य कुरा परिवारमा परमेश्वरलाई देख्नु हो ।
हरेक पुस्ता खराब र परमेश्वरको विरोधी बन्दैगएको सन्दर्भमा ख्रीष्टियान परिवार नै बलियो बन्नु मुख्य कुरो हो । दोस्रो पुस्तालाई परमप्रभुस नचिनाउने हो भने ख्रीष्टियान धर्म मात्रै मान्ने कुरा मण्डलीमा बढ्दैजानेछ र नयाँजन्म पाएकाहरूको सङ्ख्या घट्दै जानेछ ।
त्यसर्थ… हाम्रा परिवारहरू बालबालिकाको लागि परमेश्वरको वचन सिक्ने र उहाँलाई चिन्ने उपयुक्त ठाउँ बन्न सकोस् ।